Академик менежментын талаар энд тэндээс.

Боловсролын салбарт сайн менежмент дутагдаж байгааг хэн бүхэн мэдэрч байгаа. Академик менежмент гэж зүйлд бид суралцах хэрэгтэй байгаа.

Олон жилийн турш эдийн засгийн хөшүүргийг чухалчилж үзэлгүй явж ирсэн манай улсын шинжлэх ухааны байгууллагууд энэ тал дээр мэдлэг туршлага дутагдаж байгаа нь ойлгомжтой. 

Барууны их сургуулиуд аль болохоор шинэ мэдлэг, судалгааны үр дүнгээ үйлдвэрлэлд нэвтрүүлж санхүүжилтын шинэ эх үүсвэр олохыг эрмэлзэх болсон нь улс, муж, орон нутгийн төсвөөс орж ирдэг мөнгө багасч байгаатай холбоотой болов уу. Монголын хувьд бол бүр хэцүү замаар явж байгаа л даа. Улс их сургуулийн нийт орлогын 3-5 %-г  урсгал зардлын санхүүжилт хэлбэрээр,  дахиад  3-4 %-г ШУТС-н судалгааны төслийн санхүүжилт хэлбэрээр өгдөг. Иймд улсын төсвөөс өгөх санхүүжилт бага байгаа нь ойлгомжтой.

Нөгөө талаар шинжлэх ухааны байгуулагууд өөрсдөө орлогынхоо бүтцийг өөрчлөх арга замуудыг хайх ёстой. Тэгэхийн тулд их сургуулийн профессор бүр, нэгж бүр өөрөө өөртөө менежер байх шаардлагатай байна. Номноос энэ тухай харж байгаад өөрийнхөөрөө буулгасан чинь дараахь зүйлийг хэлж байнаа.    

Жишээлбэл профессор багийн удирдагч бол лидер, эрдэмтэн, менежер, хөгжүүлэгч байх хэрэгтэй. Үүргийнхээ хувьд   

1. Судлаач - судалгааны чиглэлийнхээ лидер байх. 
2. Удирдагч (лидер) - тухайн багийнхаа холын зорилтыг харах, урт хугацааны чиглэл,  төлөвлөлтийг хийх.
3.  Хөгжүүлэгч - шаардлагатай хамгийн чадвартай хүний нөөцийг бий болгох, түүнийгээ үнэлж дүгнэх.
4.  Менежер - урт хугацааны төлөвлөгөөг хэрэгжүүлэх

гэж тодорхойлсон байна.

Минийхээр их сургуулийн аль ч түвшний шийдвэр гаргагч энэ 4 үүргийг хүлээх бөгөөд шийдвэр гаргах түвшин, зэрэглэлээсээ хамаарч ур чадварын хуваарилалт нь өөр өөр байх болов уу. Жишээ нь профессорын хувьд судалгааны чиглэлийнхээ тэргүүлэгч, сайн эрдэмтэн байх шаардлага хамгийн гол шалгуур бол деканы хувьд хөгжүүлэгч, менежерын чадвартай профессор байх ёстой. Сургуулийн захирлын хувьд бол удирдагчийн үүрэг нь илүү чухал байх ёстой боловч судлаачийн хувьд профессорын хэмжээнд, хөгжүүлэгч, менежерийн хувьд деканы түвшинд дор хаяж байх ёстой болж байна.

Цааш нь менежерын үндсэн үүргийг номноос харсан чинь

• Ажлаа төлөвлөх
• Төлөвлөсөний дагуу ажлаа зохион байгуулах
• Удирдаж явуулах
• Үр дүнгээ шалгаж дүгнэх

гэж байх юм. Цааш нь уншвал ч их юм байгаа болтой, гэхдээ нэг номон дээр стандарт textbook амьдралд хэрэг болдоггүй гэдгийг санаад, үүгээр бичлэгээ дуусгахаар шийдлээ. Kk.

Блогтоо юм бичээгүй нэлээд удсан байна, цаашид боломжоороо бичиж байнаа.

Юуны өмнө миний блогыг уншдаг, санал бодлоо хуваалцдаг хүн бүхэнд талархал илэрхийлье.

 Саяхан би шинэ ажилд томилогдсон, тэгсэн зарим хүмүүс чи хэзээ ч дарга болохгүй гэдэггүй билүү гэж асууж байсан. Энэ ажлыг авсан шалтгаанаа хэлье.

·         Бид эрх мэдэлтнүүдийн алдааг хэлж залруулж, яаж ажиллахыг нь зааснаар, тэр нь бидний хүссэнээр явах магадлал маш бага юм байна. Иймээс ямар нэг санаа, зорилго, хүсэл байгаа бол өөрсдөө хариуцлага үүрч хэрэгжүүлэхэд шууд оролцох ёстой гэдгийг ойлголоо.

·         Албан тушаал гэдгийг амархан амьдрах боломж эсвэл өөрийгөө нийгэмд эзэлэх байр суурийг өндөр болгох арга гэж үздэг хүмүүст түүнийгээ биелүүлэх амар боломж гаргаж өгөх нь буруу гэж бодлоо. Монголд эрх мэдэлтэй болмогц, за одоо өөртөө ашигтай юу хийж болох вэ гэдгийг боддог хүмүүс олон байдаг.

·         Би одоо хүртэл манай сургууль шиг нэр хүнд, хүний нөөцийн потенциальтай байгууллага хүчээ нэгтгэвэл хувь хүн, нэг багш, нэг ажилтан сайхан ажиллаж амьдрах орчинг амархан бий болгож болно гэж итгэдэг. Хамт олон, зохион байгуулалттай баг гэдэг бол хувь хүнээс хэд дахин илүү хүчтэй байдаг гэдэгтэй хүн бүхэн санал нийлэх болов уу. Иймд миний хувийн эрх ашиг ч МУИС хөгжиж дэвжиж байж биелнэ гэж үздэг.

Энэ асуудлаар нэг иймэрхүү.

Цаашид барьж ажиллах зарчмууд.

Зарчим 1.

Нээлттэй байх.

Зарчим 2.

Шударга байхыг ажлын эрх ашигтай эн тэнцүү авч үзнэ.

Зарчим 3.

Багш ажилтнуудын хүсэл, зорилгыг үндэс болгож ажиллана.

Ойрын зорилго зорилт, хийх ажлууд.

• Бүх тайлан материалуудыг нээлттэй болгох

• Профессор, багш нартай уулзаж санал сонсох, зөвлөх баг бүрдүүлэх

• МУИС-ийн гадаад дотоод хамтын ажиллагааны боломжит чиглэлүүдийг судалж, санхүүгийн шинэ эх үүсвэрүүдийг бий болгох ажлыг эхлүүлэх

Багш нартаа Монголын багш нарын өдрийн баярыг хүргэе. Богинохон үйл явдлын товчоон оруулья.  

·         2010 оны 1 сарын 25-нд Ардчилсан хүчний холбоо гэдэг төрийн бус байгууллага байгуулагдсан  болохыг та бүхэн сонссон байх.

 Энэ байгууллагын эрхэм зорилго, зорилтод  нь

“Монголоо шинэчлэе” гэсэн, ардчилсан үзэлтэй, Монгол улсын шударга иргэдийг улс орныхоо хөгжилд хувь нэмэр болоход нь дэмжиж ажиллах нь тус холбооны эрхэм зорилго байна.

гэсэн байгаа нь таалагдаад байгаа. АХХ-ныхондоо амжилт хүсье.

·         2010 оны 1 сарын 23-нд нийслэлийн захиргааны  хэргийн шүүх хурал болж, МУИС-ийн захирлын сонгон шалгаруулалтыг дахин явуулахыг БСШУЯ-ны төрийн албаны салбар зөвлөлд даалгасан шийдвэр гаргалаа. Энэнээс цааш ямар шийдвэр гарах ёстой юм бол.

Шүүхийн шийдвэрийг уландаа гишгэдэг, хууль, төр засаг зөвхөн өөрт нь үйлчлэх ёстой гэж боддог сайд байхад бас МУИС-ийг өөрийн өмч мэтээр ойлгож, өөрийг нь байхгүй бол сургууль байхгүй гэж боддог хүмүүс байх юм даа.

No further comments, too funny.

·         2010 оны 1 сараас долоо хоног бүр “Монголын сэргэн мандалт” гэдэг  цуврал лекцэнд сууж байгаа юм. Тэнд хувь хүний ашиг сонирхол, нийтийн эрх ашгийн талаар яригдсан юм.

Манай улс төрчид

“Би орон гэрээ тохинуулчихлаа, одоо төр засгаа тохинуулна ”

 гэж гарч ирээд үргэлжлүүлэн  гэрээ тохинуулаад, жаахан цаашлахаараа хамаатан ах дүүгээ тохинуулаад байдаг нь санаанд оров. Улаанбаатарын УТААг бодохоор хааяа инээд хүрээд байдгийн. Хувийн агаар гэж юм байхгүй юм даа. Кк.

Ашиг сонирхол нь гэр орон ах дүүсийн түвшнээс гарч улс орон, дэлхийн хэмжээнд бодож, түүний төлөө ажиллаж чаддаг хүн Монголын улс төрд гарч ирэх болов уу.